काठमाडौं–मन्त्रिपरिषद्का पूर्व अध्यक्ष खिलराज रेग्मीले त्रिशुली दुर्घटनामा बेपत्ता पूर्व गृह तथा परराष्ट्रमन्त्री माधवप्रसाद घिमिरेको खोजीमा प्रयाप्त पहल गर्न सरकारको ध्यानाकर्षण गराएका छन्।
उनले छिमेकी मुलुकबाट विज्ञ र प्रबिधि झिकाएर भएपनि खोजी कार्यलाई सफल पार्न ध्यानाकर्षण गराएका छन्। घिमिरे रेग्मी सरकारका गृह तथा परराष्ट्रमन्त्री थिए।
प्रधानमन्त्री पुष्पकमल दाहाल र उपप्रधान तथा गृहमन्त्री विमलेन्द्र निधिसँग टेलिफोन सम्पर्क गरेर रेग्मीले दुर्घटनाको ४० घन्टा बितिसक्दा पनि घिमिरेको अवस्था अज्ञात रहेकोप्रति चिन्ता र चासो जनाएका हुन्।
घिमिरेको खोजी गर्न भारतीय सीमासम्म जनशक्ति परिचालन गर्न उनले आग्रह गरेका छन्।
‘दुर्घटना भएको चालिस घण्टाभन्दा बढी समय बितिसक्दा पनि सरकारले पूर्वमन्त्री घिमिरे र उहाँका पारिवारिक सदस्यहरुको स्थितिका बारेमा जानकारी गराउन नसकेकोमा चिन्तित हुँदै रेग्मीले प्रधानमन्त्री पुष्पकमल दाहाल प्रचण्डसँग सम्पर्क गरी खोजी र उद्धारको कार्यमा अत्याधुनिक उपकरणहरु प्रयोग गर्न र खोजी कार्य गण्डक नहरको भारतीय सीमासम्म पुर्याउन विशेष आग्रह गर्नुभएको छ ।’ रेग्मीका प्रेस संयोजक राजेन्द्र पाण्डेद्वारा प्रेषित प्रेस नोटमा उल्लेख छ।
मुक्तिनाथ दर्शन गरेर फर्कदा आइतबार साँझ घिमिरे चढेको बा ९ च १५३१ नम्बरको गाडी पृथ्वी राजमार्गअन्तर्गत घोप्टेभिरमा दुर्घटना भई त्रिशूली नदीमा खसेको थियो।
