रुपन्देहीको देवदहमा बस दुर्घटना एकजनाको मृत्यु, आठ जना घाईते

भगवती पाण्डे
बुटवल, कार्तिक २४
पूर्व पश्चिम महेन्द्र राजमार्ग अन्तर्गत रुपन्देहीको देवदहमा यात्रु वाहक बस दुर्घटना हुंदा एकजना यात्रुको मृत्यु भएकोे छ । दुर्घटनामा परि ८ जना घाईते भएका छन् भने घाईतेमध्ये तिनजनाको अवस्था गम्भिर रहेको पश्चिम क्षेत्रिय ट्राफिक प्रहरी कार्यालय बुटवलले जनाएको छ ।
प्रहरीका अनुसार धनगढीबाट काठमाण्डौ जांदै गरेको ना. ४ ख २५१५ नं. को रात्रीबस सोमबार राती देवदह ८ शितलनगरमा सडकमा अनियन्त्रीत भई दुर्घटनाग्रस्त भएको हो ।
मृतकको साथमा रहेको परिचयपत्रको आधारमा मृतक यूएनमा कार्यरत रेणु शाक्य रहेको प्रहरीले जनाएको छ । मृतकको ठेगाना भने खुल्न सकेको छैन ।
राती करिब पौने तिन बजे तिर भएको उक्त दुर्घटनापछि बस सडकबाट वायांतर्फ पल्टिएको प्रहरीले जनाएको छ ।
कुनै साधन वा वस्तु केहि संग पनि ठक्कर नखाएको अवस्थामा भएको दुर्घटनाको आधारमा चालक निदाएको कारण दुर्घटना भएको हुनसक्ने प्रहरीले आशंका गरेको छ । यद्धपी प्रहरीले चालकलाई नियन्त्रणमा लिएर घटनाको अनुसन्धान गरिरहेको जनाएको छ ।